Folkeleg kultur har sidan midten av 1800-talet hatt høg status i Noreg, skriv Valdresmusea i søknaden. Framstillinga har derimot vore sterkt ideologisk og lite verdinøytral. Under andre verdskrigen fekk folkekulturen ei politisk side, då okkupasjonsmaktene gjorde denne til middel for sin propaganda. I folkemusikk- og folkedansrørsla har dette vore sterkt underkommunisert. Gjennom utstillinga ”Folkemusikk og nazisme” vil museet sjå på tilknytinga mellom folkemusikkrørsla og det nasjonalsosialistiske propagandaapparatet.

- Dette er eit godt prosjekt med aktuell og spennande tematikk, seier seksjonsleiar Espen Hernes i Kulturrådet.

Nye spørsmål

I musea har formidling av folkemusikk og folkedans sjeldan vore anna enn hyggeleg stadfesting av norsk identitet og kvardagsliv. Eit mål for Valdresmusea er derimot å stille nye spørsmål til feltet og om feltet, og å gje rom for innfallsvinklar som kastar nytt lys over folkemusikk- og folkedansutøvinga på 1900-talet.

Utstillinga ”Folkemusikk og nazisme” presenterer særleg to emne: For det fyrste drøftar museet fascinasjonen for norsk folkemusikk og folkedans hjå okkupasjonsmaktene. Kva var bakgrunnen for denne interessa og korleis kom dette til uttrykk?

For det andre drøfter ein motivasjon og bakgrunn for at norske folkemusikarar og folkedansarar tok del i den nasjonalsosialistiske propagandaen. Var det økonomi, sosiale tilhøve eller ideologisk overtyding som førde dei inn i apparatet? Kva var reaksjonane i bygdesamfunnet under og etter verdskrigen? Utfordringa vil vere å skapa portrett av heile menneske, portrett som ikkje støyter, men som legg vinn på å forstå og forklare dei spørsmåla og vala som desse menneska stod ovanfor, og som dei tok.

Sentralt i utstillinga vil vere plakatar, tekstar og bilete som syner norsk folkemusikk og folkedans demonstrert gjennom det tyske propagandaapparatet.

Sjå heile søknaden til Valdres museum her  

Sjå alle tildelingane her

Kontaktperson i Kulturrådet

Seksjonsleiar Espen Hernes, 21045832