Kart er ein stadig viktigare ressurs for brukarar av digitale tenester. Likevel er tilbodet dårleg utbygd på karttenester knytta til samfunns- og kulturforhold. I dag fins ikkje karttenester på nett med historisk-administrative inndelingar i Noreg.

Statens kartverk ønskjer å gjere noko med dette i eit prosjekt som skal etablere digitale kartdata med særleg fokus på kommune-, amts- og fylkesgrenser.

-Etablering av eit sikt register og høve til å bruke dette via ulike tenester online, er heilt i tråd med samkøyring, synergi og delingstanken i abm-sektorane, seier avdelingsdirektør Gunnar Urtegaard i ABM-utvikling som har løyvd 200 000 kroner til prosjektet.

Registeret skal og innehalde geistelege inndelingar og oversikt over len, fogderier, sorenskrivardistrikt og tinglag.

Prosjektet er fleirårig og Statens kartverk samarbeider med  Norsk lokalhistorisk institutt (NLI), Riksarkivet og Universitetet i Oslo. Innhaldet vil ha fokus på kommunegrenser og endringar frå 1938 og fram til i dag. Mange digitale tenester på Internett som inneheld historisk materiale frå Noreg vil få glede av løysinga.