Den nye nettstaden blei lansert tirsdag 21. juni. Gå til Kulturnett Sogn og Fjordane her.

- Kulturlivet i fylket treng eit forum for dialog og debatt. Vi har invitert leiarar i viktige kulturinstitusjonar i fylket til å blogge hos oss om ulike tema innan kultur. Ingebjørg Erikstad, fylkesdirektør for kultur i Sogn og Fjordane fylkeskommune, er først ut. Etter ho vil leiarar innan kulturlivet publisere bloggpostar om lag to gongar i månaden, seier Øystein Åsnes i Kulturnett Sogn og Fjordane. 

Kulturarv

Eit av hovudmåla for kulturnettet er å synleggjere og formidle kulturarven og kulturlivet i Sogn og Fjordane og knyte saman informasjon frå ulike kjelder til ein heilskap. Opplysningar om personar, stader og hendingar er spreidde på ei stor mengde institusjonar og kjelder rundt om i heile landet (og i utlandet). I tillegg til ein splitter ny kulturblogg, byr det nye kulturnettet difor også på eit nytt søk i kulturarvsinformasjon. 

- Kultursøket er eit steg på vegen for å samle denne informasjonen og presentere den på ein brukarvenleg måte, seier Åsnes.

Gå til Kultursøk

Over 50 små og store institusjonar frå heile landet leverer innhald til denne nye tenesta.  Søket er utvikla i samarbeid med Norsk kulturråd og firmaet Delving B. V. i Nederland. Sogn og Fjordane er det første fylket som tek i bruk den nye tenesta. Kultursøket gir deg samtidig oversikt over treff i andre sentrale oppslagsverk som Wikipedia, Lokalhistoriewiki og NRK sitt Fylkesleksikon.